ກອງປະຊຸມປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງ 5 ໜ່ວຍພັກ ທີ່ຂຶ້ນກັບຄະນະພັກຮາກຖານວິທະຍາໄລຄູຫຼວງນໍ້າທາ ຄັ້ງ ວັນທີ 21/11/2019

ໃນຕອນເຊົ້າຂອງວັນທີ 21 ພະຈິກ 2019 ທີ່ສະໂມສອນວິທະຍາໄລຄູຫຼວງນໍ້າທາ ໄດ້ເປີດກອງປະຊຸມປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງ 5 ໜ່ວຍພັກທີ່ຂຶ້ນກັບຄະນະພັກຮາກຖານວິທະຍາໄລຄູຫຼວງນໍ້າທາຄື: ໜ່ວຍພັກວິທະຍາສາດສັງຄົມ, ໜ່ວຍພັກວັດຜົນ-ປະເມີນຜົນ, ໜ່ວຍພັກອະນຸບານ-ປະຖົມ, ໜ່ວຍພັກກິດຈະກຳນັກສຶກສາ ແລະ ໜ່ວຍພັກບໍລິຫານ-ການເງີນ ຄັ້ງທີ 2 ຮອບທີ 2 ໂດຍການໃຫ້ກຽດເຂົ້າຮ່ວມຂອງ ສະຫາຍ ປະລີນຍາໂທ ຄຳສຸກ ທອງກ່ານ ເລຂາຄະນະພັກຮາກຖານວິທະຍາໄລຄູຫຼວງນໍ້າທາ, ມີຕາງໜ້າຈາກ 3 ອົງການຈັດຕັ້ງພັກຂັ້ນແຂວງ, ມີເລຂາໜ່ວຍພັກ 5 ໜ່ວຍ, ມີຄະນະພັກຮາກຖານ, ເລຂາໜ່ວຍອ້ອມຂ້າງທີ່ຂຶ້ນກັບຮາກຖານວິທະຍາໄລຄູ ຕະຫຼອດຮອດສະມາຊິກພັກພະນັກງານຄູອາຈານ ແລະ ນັກສຶກສາ ເຊິ່ງມີຜູ້ເຂົ້າຮ່ວມທັງໝົດ 166 ສະຫາຍ ຍິງ 86 ສະຫາຍ. ກ່ອນການກ່າວເປີດຢ່າງເປັນທາງການ ປະທານກອງປະຊຸມກໍໄດ້ແນະນຳບາງຈຸດກ່ຽວກັບການລາຍງານຂອງແຕ່ລະໜ່ວຍພັກເພື່ອຄວາມເປັນເອກະພາບ ແລະ ກ່າວເປີດຢ່າງເປັນທາງການໃນເວລາ 8 ໂມງ 20 ນາທີ.ຈາກນັ້ນ, ກອງປະຊຸມກໍໄດ້ຮັບຟັງການລາຍງານບົດປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນຂອງແຕ່ລະໜ່ວຍພັກ ທັງ 5 ໜ່ວຍພັກ ປະຈຳປີ 2019 ແລະ ທິດທາງແຜນການສູ້ຊົນໃນປີ 2020 ເປັນລຳດັບຄື: ສະຫາຍ ປະລີນຍາໂທ ສຸກັນໄຊ ພົງສະຫວັນ ເລຂາໜ່ວຍພັກວິທະຍາສາດສັງຄົມຕາງໜ້າໜ່ວຍພັກວິທະຍາສາດສັງຄົມ ຂຶ້ນຜ່ານ.ໜ່ວຍພັກອະນຸບານ-ປະຖົມ ຂຶ້ນຜ່ານໂດຍ ສະຫາຍ ປະລີນຍາໂທ ແດງ ທອງສິງ ເລຂາໜ່ວຍພັກອະນຸບານ-ປະຖົມ. ສະຫາຍ ປະລີນຍາຕີ ຄຳພອນ ໄລດາວົງ ຮອງເລຂາໜ່ວຍກິດຈະກຳນັກສຶກສາຕາງໜ້າໜ່ວຍກິດຈະກຳນັກສຶກສາ ຂຶ້ນຜ່ານ.ຕາງໜ້າໜ່ວຍພັກວັດຜົນ-ປະເມີນຜົນ ຂຶ້ນຜ່ານໂດຍ ສະຫາຍ ປະລີນຍາໂທ ທຽມພະຈັນ ທະນຸງສິງ ຮອງເລຂາໜ່ວຍພັກວັດຜົນ-ປະເມີນຜົນ. ສະຫາຍ ປະລີນຍາໂທ ຄຳມ່ວນ ສິດປະເສີດ ເລຂາໜ່ວຍພັກບໍລິຫານ-ການເງີນຕາງໜ້າໜ່ວຍພັກບໍລິຫານ-ການເງີນ ຂຶ້ນຜ່ານ.ຈາກນັ້ນ, ບັນດາຜູ້ແທນກອງປະຊຸມກໍໄດ້ມີການປະກອບຄຳຄິດເຫັນໃສ່ບົດປະເມີນຂອງທັງ 5 ໜ່ວຍພັກ ຢ່າງກົງໄປກົງມາເປັນຕົ້ນແມ່ນຮ່າງບົດປະເມີນ, ການຈັດໜ້າເຈ້ຍ, ການພີມ ແລະ ຫຼັກໄວຍາກອນ, ບັນດາຕົວເລກໃນບົດປະເມີນ ແລະ ບາງຄຳຖາມອັນເປັນຂໍ້ຂ້ອງໃຈທີ່ບໍ່ມີຄວາມເປັນເອກະພາບ ໃຫ້ອົງການຈັດຕັ້ງພັກຂັ້ນແຂວງຊີ້ແຈງໃຫ້ຊັດເຈນຂຶ້ນ. ກອງປະຊຸມໄດ້ມີການລົງປະຊາມະຕິຮັບຮອງເອົາ 5 ໜ່ວຍພັກເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ແລະ ເພື່ອສະເໜີຕໍ່ຂັ້ນເທິງພິຈາລະນາ.ໃນຕອນທ້າຍ ສະຫາຍ ນາງ ເພັດດາວັນ ຈັນທະເພັງ ກໍໄດ້ຕາງໜ້າໃຫ້ທັງ 5 ໜ່ວຍພັກຂຶ້ນຜ່ານບົດບັນທຶກກອງປະຊຸມ ແລະ ພ້ອມທັງມີການປະກອບຄຳຄິດຄຳເຫັນໃຫ້ມີຄວາມເປັນເອກະພາບກັນ. ພິທີໄດ້ສີ້ນສຸດລົງໃນເວລາ 12 ໂມງ 15 ນາທີ.

ຜູ້ສື່ຂ່າວວິທະຍາໄລຄູຫຼວງນໍ້າທາ ລາຍງານ
ທອງດີ ບູ້ກໍອີ່ລົງ