ເປີດອົບຮົມຫັດແອບວຽກງານປ້ອງກັນຊາດໃຫ້ວິທະຍາໄລຄູຫຼວງນໍ້າທາ ສົກຮຽນ 2023-2024

#ເປີດອົບຮົມຫັດແອບວຽກງານປ້ອງກັນຊາດໃຫ້ວິທະຍາໄລຄູຫຼວງນໍ້າທາ ສົກຮຽນ 2023-2024
ກອງປະຊຸມຝຶກອົບຮົມ-ຫັດແອບ ວຽກງານປ້ອງກັນຊາດ ໃຫ້ວິທະຍາໄລຄູຫຼວງນໍ້າທາ ປະຈໍາສົກຮຽນ 2023-2024 ໄດ້ເປີດຂື້ນຢ່າງເປັນທາງການ ໃນວັນທີ 16 ມັງກອນ 2024 ທີ່ສະໂມສອນວິທະຍາໄລຄູ ຫຼວງນໍ້າທາ, ພາຍໃຕ້ການເປັນປະທານຮ່ວມໂດຍ ທ່ານ ສີວິໄລ ແກ້ວພິລາວັນ ຄະນະພັກຮາກຖານ, ຮອງຜູ້ອໍານວຍການວິທະຍາໄລຄູຫຼວງນໍ້າທາ; ພັທ ໂຊກສະຫວັນ ພົນຕະມອງ ຫົວຫນ້າພະແນກການທະຫານທ້ອງຖິ່ນ. ໃນພິທີມີຄະນະອໍານວຍການເຂົ້າຮ່ວມ, ຄູຝຶກ, ຄະນະຮັບຜິດຊອບຈາກ ພະແນກການທະຫານທ້ອງຖິ່ນ ແລະ ວິທະຍາໄລຄູຫຼວງນໍ້າທາ ພ້ອມດ້ວຍນັກສຶກສາ ເຂົ້າຮ່ວມ ທັງໝົດ 95 ທ່ານ, ຍິງ 62 ທ່ານ.
ໃນພິທີ ທ່ານ ພັທ ຫລ້າພອນ ມະນີວົງລັດ ຮອງພະແນກການທະຫານທ້ອງຖິ່ນ ໄດ້ຂຶ້ນຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຊີ້ນໍາລວມ, ຄະນະຊີ້ນໍາວິຊາການ, ຄູສອນ ແລະ ຜູ້ຊ່ວຍປະຕິບັດລູກປືນແທ້ ພາກສ່ວນຮັບປະກັນເປີດຊຸດອົບຮົມ-ຫັດແອບ ວຽກງານສຶກສາປ້ອງກັນຊາດ ວິທະຍາໄລຄູຫຼວງນໍ້າທາ ສົກຮຽນ 2023-2024
ໃນພິທີຍັງໄດ້ຮັບຟັງການໂອ້ລົມຈາກຄະນະນໍາວິທະຍາໄລຄູຫຼວງນໍ້າທາ ໂດຍແມ່ນ ທ່ານ ສີວິໄລ ແກ້ວພິລາວັນ ເຊິ່ງທິ່ງທ່ານໄດ້ເນັ້ນໜັກເຖິງ ຄວາມສຳຄັນ, ຄວາມຈຳເປັນໃນການເຝິກແອບການທະຫານໃຫ້ແກ່ນັກສຶກສາວິທະຍາໄລຄູຫຼວງນໍ້າທາ, ໃນໂອກາດນີ້ ທ່ານຍັງໄດ້ຮຽກຮ້ອງໃຫ້ນັກສຶກສາທຸກຄົນ ຈົ່ງຕັ້ງໃຈສຶກສາຮໍ່າຮຽນ, ຝຶກແອບຍຸດທະວິທີ ແລະ ມິລະບຽບວິໄນ ປະຕິບັດຕາມການສິດສອນຂອງຄູຝຶກຢ່າງເຄັ່ງຄັດ.
ໃນໂອກາດດຽວກັນ ທ່ານ ພັທ ໂຊກສະຫວັນ ຍັງໄດ້ຂຶ້ນມີຄຳເຫັນ ເວົ້າເຖິງເນື້ອໃນການເຝິກແອບ ຕະຫຼອດຊ່ວງໄລຍະການຝຶກອົບຮົມ ເຊິ່ງຈະໄດ້ດໍາເນີນທັງພາກທິດສະດີ ແລະ ພາກສະໜາມ ມີ 4 ພາກ ດັັ່ງນີ້:
1. ພາກການເມືອງ
2. ພາກລະບຽບ-ຮູບແຖວ
3. ພາກສິນລະປະຍຸດ
4. ພາກຍຸດທະວິທີ
ກອງປະຊຸມຝຶກອົບຮົມ-ຫັດແອບ ວຽກງານປ້ອງກັນຊາດ ໃຫ້ວິທະຍາໄລຄູຫຼວງນໍ້າທາ ປະຈໍາສົກຮຽນ 2023-2024 ໄດ້ມີນັກສຶກສາເຂົ້າຮ່ວມທັງໝົດ 81 ຄົນ, ຍິງ 60 ຄົນ, ຈະໄດ້ດໍາເນີນໄປເປັນເວລາ 12 ວັນ ແລະ ຈະໄດ້ສໍາເລັດລົງໃນວັນທີ 27 ມັງກອນ 2024.
ນັກຂ່າວວິທະຍາໄລຄູຫຼວງນໍ້າທາ    ສົມແພງ ດວງປະເສີດ

Leave a Comment

Your email address will not be published. Required fields are marked *

Scroll to Top