Author name: ຄິດ ບຸນສະແຫວງ

ກອງປະຊຸມໃຫຍ່ສະມາຊິກພັກ ຂອງຄະນະພັກຮາກຖານວິທະຍາໄລຄູຫຼວງນໍ້າທາ ຄັ້ງທີ IV ໄດ້ເປີດຂຶ້ນໃນຕອນເຊົ້າຂອງວັນທີ 27 ມີນາ 2025 ໂດຍເປັນປະທານຂອງ ສະຫາຍ ນາງ ນວນຈັນ ທິບພະວົງ ເລຂາຄະນະພັກຮາກຖານ ຜູ້ອຳນວຍວິທະຍາໄລຄູຫຼວງນໍ້າທາ. ເປັນກຽດເຂົ້າຮ່ວມຂອງ ສະຫາຍ ຫຼ້າປະເສີດ ສີປະເສີດ ຄະນະກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີຜູ້ແທນເຂົ້າຮ່ວມ 116 ສະຫາຍ, ຍິງ 55 ສະຫາຍ. ເຊິ່ງເປັນຕົວແທນໃຫ້ແກ່ສະມາຊິກພັກທັງໝົດ 106 ສະຫາຍ, ຍິງ 51 ສະຫາຍ. ແຂກຖືກເຊີນ 10 ສະຫາຍ, ຍິງ 04 ສະຫາຍ.ບັນດາສະຫາຍເຂົ້າຮ່ວມກອງປະຊຸມ ໄດ້ຍົກສູງຄວາມຮັບຜິດຊອບ ແລະ ສຸມສະຕິບັນຍາຂອງຕົນເຂົ້າໃນການຄົ້ນຄວ້າປະກອບ ຄໍາຄິດຄໍາເຫັນຕໍ່ກອງປະຊຸມ ກົງໄປກົງມາ ເຮັດໃຫ້ກອງປະຊຸມດຳເນີນໄປດ້ວຍບັນຍາກາດຟົດຟື້ນ ແລະ ສຳເລັດຕາມຈຸດປະສົງທີ່ໄດ້ວາງໄວ້. ກອງປະຊຸມໃຫຍ່ຄັ້ງທີ IV ຂອງຄະນະພັກຮາກຖານວິທະຍາໄລຄູຫຼວງນໍ້າທາໄດ້ລົງປະຊາມະຕິເປັນເອກະສັນກັນ ຮັບຮອງເອົາບັນດາເນື້ອໃນທີ່ສຳຄັນ ດັ່ງລຸ່ມນີ້: ກອງປະຊຸມໄດ້ພ້ອມກັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ຮ່າງບົດລາຍງານການເມືອງ, ທິດທາງຄາດ ໝາຍສູ້ຊົນແຕ່ປີ 2025 ຫາປີ 2030 ແລະ ບົດສໍາຫຼວດການນຳພາລວມຂອງຄະນະພັກຊຸດເກົ່າ, ໃນນັ້ນໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການຊີ້ນຳ-ນຳພາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຜ່ານມາ, ພ້ອມນີ້ ກອງປະຊຸມຍັງໄດ້ເປັນເອກະສັນກັນຮັບຮອງເອົາທິດທາງ, ແຜນການ 5 ປີ ນັບແຕ່ປີ.2025 ຮອດປີ 2030 ເຊິ່ງມີເນື້ອໃນພຶ້ນຖານຕົ້ນຕໍດັ່ງນີ້: ສືບຕໍ່ສຶກສາອົບຮົມແນວທາງນະໂຍບາຍຂອງພັກ, ກົດໝາຍຂອງລັດ, ມູນເຊື້ອອັນດີງາມຂອງພັກໃຫ້ບັນດາຄະນະໜ່ວຍພັກ ສະມາຊິກພັກ, ພະນັກງານຄູອາຈານ ແນ່ໃສ່ສ້າງທັດສະນະການເມືອງໃຫ້ຖືກຕ້ອງ, ເພີ່ມທະວີສຶກສາອົບຮົມຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ແບບແຜນດໍາລົງຊີວິດ ທີ່ປອດໃສໃຫ້ແກ່ສະມາຊິກພັກ, ພະນັກງານຄູອາຈານ; ຕ້ານແນວຄິດຫຼາຍເຄົ້າຫຼາຍພັກ, ແນວຄິດເອກະຊົນ, ສວຍໂອກາດ, ສໍ້ລາດບັງຫຼວງ, ແນວຄິດຈຸ້ມ ເຈື້ອເຊື້ອສາຍ, ກຸ່ມກ້ອນພັກພວກ, ຕ້ານແນວແນວຄິດລ່ວງລະເມີດສິດເປັນເຈົ້າ, ບໍ່ນັບຖືລະບຽບກົດໝາຍ. ສືບຕໍ່ຢຶດໝັ້ນຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບ, ເສີມຂະຫຍາຍແບບແຜນນໍາພາທີ່ເປັນມູນເຊື້ອຂອງພັກ, ເປັນຕົ້ນການເຄື່ອນໄຫວນໍາພາໂດຍຜ່ານແນວທາງ ແລະ ການຈັດຕັ້ງຂອງພັກ, ນໍາພາຕາມແນວທາງມະຫາຊົນຂອງພັກ, ເອົາການປຸກລະດົມຂົນຂວາຍສົມທົບກັບການເປັນແບບຢ່າງນໍາໜ້າຂອງສະມາຊິກພັກ, ເສີມຂະຫຍາຍປະຊາທິປະໄຕໃນໝູ່ຄະນະ, ການເຮັດວຽກມີແຜນການ, ມີການຕິດຕາມຊຸກຍູ້ຢ່າງໃກ້ຊິດ ແລະ ສະຫຼຸບຖອດຖອນບົດຮຽນເປັນແຕ່ລະໄລຍະ, ປະຕິບັດລະບອບຕິຊົມຕົນເອງ ແລະ ຕິຊົມກັນໃຫ້ແຂງແຮງກວ່າເກົ່າ; ພ້ອມກັບການເສີມຂະຫຍາຍຈິດໃຈເປັນເຈົ້າການປະດິດສ້າງ ແລະ ຄວາມຮັບຜິດຊອບຂອງບຸກຄົນໃນຄະນະພັກ. ສືບຕໍ່ຊີ້ນໍາໃນການຂຶ້ນແຜນງົບປະມານ ແລະ ສະໜອງງົບປະມານຕ່າງໆເຊັ່ນ: ການສ້າງແຜນງົບປະມານຄວາມຕ້ອງການທາງດ້ານການເງິນ, ຂຶ້ນງົບປະມານໂຄງການກໍ່ສ້າງ, ວັດສະດຸ-ອຸປະກອນຮັບໃຊ້ຫ້ອງການ, ການຮຽນ-ການສອນ, ເບີກຈ່າຍເງິນເດືອນໃຫ້ພະນັກງານຄູອາຈານ – ເບ້ຍລ້ຽງນັກສຶກສາປະຈຳເດືອນ, ປະຈຳງວດທັນເວລາ ຂຶ້ນແຜນງົບປະມານໃນການລົງປະສົບການ ແລະ ການເຝິກຫັດວິຊາຊີບ. ເອົາໃຈໃສ່ຊີ້ນຳວຽກງານກໍ່ສ້າງ, ຄຸ້ມຄອງວັດສະດຸ-ອຸປະກອນ ແລະ ພາຫະນະ. ຊຸກຍູ້ຕິດຕາມການປະເມີນການປະຕິບັດໜ້າທີ່ວຽກງານປະຈໍາປີ ຂອງພະນັກງານ-ຄູອາຈານເພື່ອສະເໜີຕໍ່ຂັ້ນເທິງປະຕິບັດການຍ້ອງຍໍ ແລະ ເລື່ອນຊັ້ນ/ຂັ້ນ. ປະຕິບັດນະໂຍບາຍຕ່າງໆ ໃຫ້ແກ່ຄູ-ອາຈານ, ພະນັກງານພາຍໃນວິທະຍາໄລຄູຕາມລະບຽບ ແລະ ນິຕິກໍາວາງອອກ, ເຜີຍແຜ່ບັນດາເອກະສານ, ມະຕິ, ຄໍາສັ່ງຕ່າງໆ ຂອງຂັ້ນເທິງແຈ້ງມາ. ຈັດຕັ້ງການປະກັນຄຸນນະພາບພາຍໃນພ້ອມທັງປະກອບຂໍ້ມູນຫຼັກຖານ 50 ຕົວຊີ້ວັດ; ຄົ້ນຄວ້າບົດສອນ, ວາງແຜນການສອນ, ຂື້ນຫ້ອງສິດສອນເປັນປົກກະຕິ ແລະ ນໍາພານັກຮຽນ ສ້າງຂະບວນການຕ່າງໆໃຫ້ມີບັນຍາກາດຟົດຟື້ນ, ເພີ່ມທະວີການຊອກຮູ້ຮໍ່າຮຽນເພື່ອພັດທະນາວິຊາສະເພາະໃຫ້ມີຄຸນນະພາບສູງຂື້ນ. ສ້າງຂະບວນເຄື່ອນໄຫວວຽກງານກິລາ, ວັນນະຄະດີ ແລະ ຂະບວນເຄື່ອນໄຫວການອອກແຮງງານອະນາໄມເຂດຮັບຜິດຊອບ ແລະ ວຽກງານອື່ນໆໃຫ້ໄດ້ຫຼາຍຂຶ້ນ, ເພື່ອຮັບໃຊ້ໃນວັນສຳຄັນຕ່າງໆ ພ້ອມທັງຊຸກຍູ້ພາກສ່ວນທີ່ເປັນເຈົ້າພາບໃນການຈັດງານບຸນວິທະຍາສາດໃຫ້ໄດ້ປີລະຄັ້ງ 1 ຄັ້ງ. ກອງປະຊຸມໄດ້ຟັງລາຍງານ ແລະ ການປະກອບຄໍາເຫັນ ຈາກຜູ້ຕາງໜ້າຫຼາຍພາກສ່ວນ ເຊິ່ງແຕ່ລະພາກສ່ວນລ້ວນແຕ່ສະແດງໃຫ້ເຫັນເຖິງຄວາມເປັນເອກະພາບ ຕໍ່ບົດລາຍງານການເມືອງ, ທິດທາງແຜນການຢ່າງກົງໄປກົງມາດ້ວຍຄວາມຮັບຜິດຊອບສູງເຮັດໃຫ້ກອງປະຊຸມມີຄວາມອຸດົມສົມບຸນຂຶ້ນຕື່ມ. ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ເຊິ່ງມີຜູ້ອອກຮັບສະໝັກເລືອກຕັ້ງ 09 ສະຫາຍ, ຍິງ 03 ສະຫາຍ ແລະ ເລືອກໄດ້ 07 ສະຫາຍ, ຍິງ 02 ສະຫາຍຄື: ສະຫາຍ ນາງ ນວນຈັນ ທິບພະວົງ ສະຫາຍ ສຸກັນໄຊ ພົງສະຫວັນ ສະຫາຍ ສົມລັດ ສົມສະຫວັດ ສະຫາຍ ນາງ ບົວສອນ ແສງມະນີ ສະຫາຍ ວຽງທາ ໄຊຍະຈັກ ສະຫາຍ ສົມເສືອງ ເດດລໍວົງ ສະຫາຍ ສິນນະກອນ ສີເມືອງ ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາເລຂາ, ຮອງເລຂາຄະນະພັກຮາກຖານ ແລະ ປະທານກວດກາພັກດັ່ງນີ້: ສະຫາຍ ນາງ ນວນຈັນ ທິບພະວົງ ເປັນເລຂາຄະນະພັກຮາກຖານ ສະຫາຍ ສຸກັນໄຊ ພົງສະຫວັນ ເປັນຮອງເລຂາຄະນະພັກຮາກຖານ ທັງເປັນປະທານກວດກາ ສະຫາຍ ນາງ ບົວສອນ ແສງມະນີ ເປັນຮອງປະທານກວດກາພັກທີ່ຢູ່ໃນຄະນະພັກຮາກຖານ ສະຫາຍ ອ່ອນນິດ ສິດທິລາດ ເປັນຮອງປະທານກວດກາທີ່ບໍ່ຢູ່ໃນຄະນະພັກຮາກຖານ ກອງປະຊຸມໃຫຍ່ໄດ້ຮັບຟັງການໂອ້ລົມຈາກ ສະຫາຍ ຫຼ້າປະເສີດ ສີປະເສີດ ຄະນະກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະພັກຊຸດເກົ່າ ທີ່ໄດ້ຊີ້ນຳ-ນໍາພາພະນັກງານ, ສະມາຊິກພັກ, ປະຊາຊົນປະຕິບັດໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫລາຍດ້ານ, ພ້ອມກັນນັ້ນສະຫາຍຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໃຫ້ຄະນະພັກຊຸດ ໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ ຈາກນັ້ນສະຫາຍໃຫ້ທິດຊີ້ນຳວຽກງານແຕ່ລະດ້ານ ໃນທາງທີ່ສ້າງສັນ, ເຊິ່ງສະຫາຍໄດ້ເນັ້ນໜັກບາງຈຸດທີ່ສຳຄັນດັ່ງນີ້: ພາຍຫຼັງສຳເລັດກອງປະຊຸມໃຫຍ່ແລ້ວໃຫ້ຄະນະພັກແບ່ງໜ້າທີ່ຮັບຜິດຊອບ ແລະ ຜັນຂະຫຍາຍວຽກພັກໃຫ້ໄດ້ຮັບຜົນດີຂຶ້ນເລື້ອຍໆ ເອົາໃຈໃສ່ຄົ້ນຄ້ວາຕີລາ ແລະ ຜັນຂະຫຍາຍວຽກງານຕ່າງໆຂອງພັກ, ກຳໄດ້ມະຕິຄຳສັ່ງຕ່າງໆກ່ຽວກັບວຽກພັກ ວຽກງານສຶກສາອົບຮົມວຽກງານການເມືອງແນວຄິດຂອງພັກພະນັກງານ. ຍົກສູງຄວາມສາມາດ ແລະ ການນຳພາຂອງພັກໃຫ້ເຂັ້ມແຂງຮອບດ້ານ. ເອົາໃຈໃສ່ວຽກງານປ້ອງການຄວາມສະຫງົບພາຍໃນ. ຊີ້ນຳນຳພາກຳແໜ້ນວຽກງານການ ຕໍ່ສູ້-ຍາດແຍ່ງ-ເພີ່ມທະວີການຮ່ວມມືກັບພານໃນ ແລະ ພາຍນອກ. ເອົາໃຈໃສ່ວຽກງານວິຊາສະເພາະ ໂດຍຍົກສູງຄຸນນະພາບການສຶກສາໂດຍອີງໃສ່ 5 ຫຼັກມູນການສຶກສາ. ເອົາໃຈໃສ່ພັດທະນາ ແລະ ປັບປຸງສະຖາບັນການສຶກສາໃຫ້ມີພາລະບົດບາດ, ມີຄຸນນະພາບສູງ ເປັນທີ່ຍອມຮັບຂອງທ້ອງຖິ່ນສູ່ສາກົນ. ຮຽກຮ້ອງໃຫ້ສະມາຊິກພັກທຸກສະຫາຍໃຫ້ການສະໜັບສະໜູນຄະນະພັກຊຸດໃໝ່ໄດ້ຈັດຕັ້ງປະຕິບັດໜ້າທີ່ວຽກງານຕາມພາລະບົດບາດ. ກອງປະຊຸມຮຽກຮ້ອງມາຍັງພະນັກງານ, ສະມາຊິກພັກ ຈົ່ງໄດ້ເຊີດຊູສະຕິ ແລະ ຄວາມຮັບຜິດຊອບການເມືອງຂອງຕົນ ໃຫ້ສູງຂຶ້ນເລື້ອຍໆ ເຮັດໃຫ້ວຽກງານການພັດທະນາການສຶກສາໃນໄລຍະໃໝ່ໃຫ້ທັນກັບສາກົນ ແລະ ຫັນປ່ຽນໃໝ່ຢ່າງຕັ້ງໜ້າເຮັດໃຫ້ພັກມີຄວາມປອດໃສ ແລະ ໜັກແໜ້ນ, ເຂັ້ມແຂງ. ນັກຂ່າວວິທະຍາໄລຄູຫຼວງນໍ້າທາ ສົມແພງ ດວງປະເສີດ

#ວິທະຍາໄລຄູຫຼວງນໍ້າທາຈັດພິທີມອບໃບປະກາສະນິຍະບັດໃຫ້ນັກສຶກສາທີ່ສໍາເລັດການສຶກສາ (ພາກປົກກະຕິ) ສົກຮຽນ2023-2024ວັນທີ 25 ກັນຍາ 2024, ທີ່ສະໂມສອນວິທະຍາໄລຄູຫຼວງນໍ້າທາ

#ບັນຍາກາດການແຂ່ງຂັນຮອບ 4 ທີມ ປະຈຳວັນທີ 23 ກໍລະກົດ 2024ກິດຈະກໍາພົບປະສິດເກົ່າ ແລະ ແຂ່ງຂັນກິລາຊິງຂັນອໍານວຍການ ສົກຮຽນ 2023-2024 ກິລາເປຕັງ ຍິງ-ຊາຍ ບານສົ່ງ ຍິງ-ຊາຍ ສະຖານທີ່: ເດີ່ນກິລາບານສົ່ງວິທະຍາໄລຄູຫຼວງນໍ້າທາ, ເດີ່ນກິລາເປຕັງວິທະຍາໄລຄູຫຼວງນໍ້າທາ

ກະຊວງສຶກສາທິການ ແລະ ກິລາ ສປປ ລາວ ຮ່ວມກັບລັດຖະບານອົດສະຕຣາລີ, ໂດຍຜ່ານແຜນງານປັບປຸງຄຸນນະພາບ ແລະ ຂະຫຍາຍໂອກາດເຂົ້າເຖິງການສຶກສາຂັ້ນພື້ນຖານ ໃນ ສປປ ລາວ (ແຜນງານບິຄວາ) ໄດ້ຈັດ “ກອງປະຊຸມເສວະນາກ່ຽວກັບສື່ການຮຽນການສອນຝຶກເວົ້າພາສາລາວ (ຝວ)” ໃນວັນທີ 11/07/2024 ທີ່ຜ່ານມາ ໂດຍການເປັນປະທານຂອງ ທ່ານ ອຸທິດ ທິບມະນີ, ຮອງຜູ້ອໍານວຍການສະຖາບັນຄົ້ນຄວ້າວິທະຍາສາດການສຶກສາ (ສວສ) ແລະ ທ່ານ ນາງ ວາເນັດຊ້າ ເຮັກກາທີ້, ເລຂາເອກ, ສະຖານທູດອົດສະຕຣາລີ ປະຈຳ ສປປ ລາວ ເພື່ອສະເຫຼີມສະຫຼອງຄວາມສຳເລັດຂອງກະຊວງ ເພື່ອການສະໜັບສະໜູນ ນັກຮຽນທີ່ບໍ່ເວົ້າພາສາລາວເປັນພາສາຫຼັກໃນຄອບຄົວ ແລະ ວາງແຜນໃນຕໍ່ໜ້າເພື່ອຂະຫຍາຍວຽກງານດັ່ງກ່າວ.ອ່ານຂ່າວເພີ່ມຕື່ມໄດ້ທີ່ລີ້ງນີ້: https://bequal-laos.org/…/the-ministry-of-education…/

ໃນຕອນບ່າຍ ວັນທີ 10 ກໍລະກົດ 2024 ທີ່ເດີ່ນກິລາວິທະຍາໄລຄູຫຼວງນໍ້າທາ ໄດ້ມີພິທີເປິດກິດຈະກໍາພົບປະສິດເກົ່າ ແລະ ແຂ່ງຂັນກິລາ ຊິງຂັນອຳນວຍການ ພາຍໃຕ້ການເປັນປະທານຂອງ ທ່ານ ອາຈານ ປທ ນາງ ນວນຈັນ ທິບພະວົງ ຜູ້ອໍານວຍການວິະທະຍາໄລຄູຫຼວງນໍ້າທາ, ໃນພິທີມີຄະນະນໍາພາກວິຊາ, ຄູ-ອາຈານ ພ້ອມດ້ວຍນັກສຶກສາເຂົ້າຮ່ວມຢ່າງຕັ້ງໜ້າ.ກິດຈະກໍາການແຂ່ງຂັນທີ່ຈັດຂື້ນໃນ ສົກຮຽນ 2023-2024 ປະກອບມີ: ກິລາບານສົ່ງ ຍິງ-ຊາຍ, ກິລາເປຕັງ ຍິງ-ຊາຍ. ນອກຈາກນີ້ຍັງມີ ກິດຈະກໍາເສີມ ເຊັ່ນ: ດຶງເຊືອກ, ຕັກນໍ້າໃສ່ແກ້ວ… ເປັນກິດຈະກໍາເສີມສ້າງເບີກບານບັນຍາກາດໃຫ້ມີຄວາມຟົດຟື້ນ.ໃນພິທີ ທ່ານ ອາຈານ ປທ ນາງ ນວນຈັນ ທິບພະວົງ ຜູ້ອໍານວຍການວິທະຍາໄລຄູຫຼວງນໍ້າທາ ໄດ້ມີຄຳເຫັນໂອ້ລົມ ເຊິ່ງທ່ານ ໄດ້ເນັ້ນຈຸດສໍາຄັນ ດັ່ງນີ້:1. ການສ້າງເງື່ອນໄຂກະກຽມຄວາມພ້ອມໃນການສ້າງວິທະຍາໄລຄູຫຼວງນໍ້າທາໃຫ້ເປັນ ສະຖານບັນສ້າງຄູ ໃນປີ 2025.2. ພາລະບົດບາດວຽກງານກິລາຕໍ່ວຽກງານການສຶກສາ, ຮັບປະກັບບັນລຸໄດ້ 5 ຫຼັກມູນການສຶກສາ.3. ເນັ້ນການແລກປ່ຽນຮຽນຮູ້ໃນການເຂົ້າຮ່ວມກິດຈະກໍາ ກິລາ-ສິລະປະຢ່າງມີວິໄນ, ເຄົາລົບການຕັດສິນຂອງຄະນະກໍາມະການ.ໃນວັນດຽວກັນເພື່ອເປັນການເສີມສ້າງບັນຍາກາດໃຫ້ມີຄວາມຟົດຟື້ນ, ໃນວັນດຽວກັນຍັງໄດ້ມີກິດຈຳກໍາແຂ່ງຂັນກິລາບານເຕະນັດກະຊັບມິດ ລະຫວ່າງ ທີມຄູ-ອາຈານ ພົບກັບ ທີມນັກສຶກສາໃນຂະນະດຽວກັນ ຍັງໄດ້ເລີ່ມມີການແຂ່ງຂັນກິລາບານສົ່ງ, ກິລາເປຕັງ ຢ່າງເປັນທາງການ.ນັກຂ່າວວິທະຍາໄລຄູຫຼວງນໍ້າທາສົມແພງ ດວງປະເສີດ

ກິລາ-ສີລະປະ ວິທະຍາໄລຄູຫຼວງນໍ້າທາ ສົກຮຽນ 2023-2024 (ລະບົບຕໍ່ເນື່ອງພັກແລ້ງ) #ກອງປະຊຸມກະກຽມຄວາມພ້ອມການແຂ່ງຂັນຊິງຂັນຜູ້ອຳນວຍການ ກິລາ-ສີລະປະ ວິທະຍາໄລຄູຫຼວງນໍ້າທາ ສົກຮຽນ 2023-2024 (ລະບົບຕໍ່ເນື່ອງພັກແລ້ງ) ໃນຕອນບ່າຍຂອງວັນທີ 24 ມິຖຸນາ 2024 ຢູ່ທີ່ຫ້ອງປະຊຸມວິທະຍາໄລຄູຫຼວງນໍ້າທາ ໄດ້ຈັດກອງປະຊຸມກະກຽມຄວາມພ້ອມໃນການຈັດກິດຈະກໍາແຂ່ງຂັນກິລາ-ສີລະປະຂື້ນ ພາຍໃຕ້ການເປັນປະທານຂອງ ທ່ານ ອຈ ປອ ສິນນະກອນ ສີເມືອງ ຮັກສາການຫົວໜ້າພະແນກບໍລິຫານ-ການເງິນ, ໃນພິທີມີຄະນະຮັບຜິດຊອບພ້ອມດ້ວຍຄະນະຫ້ອງນັກສຶກສາລະບົບຕໍ່ເນື່ອງພັກແລ້ງ ເຂົ້າຮ່ວມທັງໝົດ 40 ຄົນ, ຍິງ 25 ຄົນ. ຈຸດປະສົງໃນການຈັດກອງປະຊຸມຄັ້ງນີ້ ເພື່ອເປັນການປຶກສາຫາລືຄວາມເປັນເອກະພາບ ແລະ ກຽມຄວາມພ້ອມທີມແຂ່ງຂັນໃນການເຂົ້າຮ່ວມກິດຈະກຳການແຂ່ງຂັນກິລາ-ສີລະປະ ຊິງຂັນຜູ້ອໍານວຍການ ສົກຮຽນ 2023-2024 (ລະບົບຕໍ່ເນື່ອງພັກແລ້ງ). ໃນໂອກາດນີ້ ທ່ານ ອຈ ປອ ສິນນະກອນ ສີເມືອງ ໄດ້ສະເໜີແນວທາງ ແລະ ໃຫ້ທິດຊີ້ນໍາໃນການຈັດກິດຈະກໍາ ເຊິ່ງທ່ານໄດ້ຜ່ານເອກະສານແຈ້ງການຂອງຜູ້ອໍານວຍການວິທະຍາໄລຄູຫຼວງນໍ້າທາ ເລກທີ 0702/ວຄ.ຫຼທ, ລົງວັນທີ 24 ມິຖຸນາ 2024 ໂດຍເນື້ອໃນແມ່ນໄດ້ແຈ້ງແຜນກຽມຄວາມພ້ອມໃນ 2 ຊ່ວງໄລຍະ ດັ່ງນີ້: ວັນທີ 24 ມິຖຸນາ 2024 ຫາ 5 ກໍລະກົດ 2024 ແມ່ນມອບໃຫ້ພາກວິຊາກະກຽມຄວາມພ້ອມໃນການຈັດການແຂ່ງຂັນເພື່ອຄັດເລືອກຕົວແທນທີມນັກກິລາເຂົ້າຮ່ວມລາຍການຊິງແຂ່ງຂັນຜູ້ອໍານວຍການ. ວັນທີ 8 – 26 ກໍລະກົດ ເປັນຊ່ວງຈັດການແຂ່ງຂັນກິລາ-ສີລະປະ ປະຈໍາສົກຮຽນ 2023-2024 ຊິງຂັນຜູ້ອໍານວຍການ. ໃນໂອກາດດັ່ງກ່າວ ທ່ານຍັງໄດ້ຮຽກຮ້ອງໃຫ້ຄະນະຮັບຜິດຊອບພ້ອມດ້ວຍຄະນະຫ້ອງທີ່ເຂົ້າຮ່ວມໃນຄັ້ງນີ້ ຈົ່ງພ້ອມກັນຍົກເອົາປະເພດກິລາທີ່ມີຄວາມເປັນເອກະພາບ ແລະ ມີບັນຍາກາດຄຶກຄື້ນມ່ວນຊື່ນ. ພ້ອມດຽວກັນນີ້ຕ້ອງຮັບປະກັນຄວາມປອດໄພ ແລະ ມີນໍ້າໃຈນັກກິລາໃນການເຂົ້າຮ່ວມການແຂ່ງຂັນ, ເຄົາລົບການຕັດສິນຂອງຄະນະກໍາມະການ. ຜ່ານການສະເໜີລາຍການປະເພດກິລາ-ສີລະປະ ແລະ ມີການປະກອບຄຳຄິດເຫັນຢ່າງສ້າງສັນ, ໃນກອງປະຊຸມໄດ້ຕົກລົງເຫັນດີເປັນເອກະພາບ ດັ່ງນີ້: @ ການແຂ່ງຂັນສີລະປະ ປະກອບມີ: ເຕັ້ນລີລາລີລາດ, ຮ້ອງເພງປະສານສຽງ (ລວມໝູ່) @ ການແຂ່ງຂັນກິລາ ປະກອບມີ: ກີລາບານສົ່ງ ຍິງ-ຊາຍ, ກິລາເປຕັງ ຍິງ-ຊາຍ ກອງປະຊຸມໄດ້ດຳເນີນໄປເປັນເວລາ 2 ຊົ່ວໂມງ ແລະ ໄດ້ສໍາເລັດລົງໃນເວລາ 11:30 ນາທີດ້ວຍບັນຍາກາດຈົບງາມທີ່ຫ້ອງປະຊຸມວິທະຍາໄລຄູຫຼວງນໍ້າທາ. ຜູ້ສື່ຂ່າວວິທະຍາໄລຄູຫຼວງນໍ້າທາ ສົມແພງ ດວງປະເສີດ

#ນັກສຶກສາຫໍພັກ(ຕຶກອະນຸບານສາທິດ)ສ້າງຂະບວນການຕ້ອນຮັບເນື່ອງໃນໂອກາດເປີດສົກຮຽນໃໝ່ລະບົບຕໍ່ເນື່ອງພັກແລ້ງ ສົກຮຽນ 2023-2024 ໃນຕອນເຊົ້າຂອງວັນທີ 28 ມິຖຸນາ 2024 ຢູ່ທີ່ເດີ່ນກິລາສາທິດວິທະຍາໄລຄູຫຼວງນໍ້າທາ ໄດ້ມີຂະບວນການອອກແຮງງານອະນາໄມຕົ້ນໄມ້ອ້ອມເດີ່ນກິລາ, ພາຍໃຕ້ການນໍາພາຂອງ ທ່ານ ສົມແພງ ດວງປະເສີດ ຄະນະຮັບຜິດຊອບ ຄຸ້ມຄອງນັກສຶກສາຫໍພັກຕຶກອະນຸບານສາທິດ ໃນຂະບວນການມີ ຄະນະຕຶກ, ນັກສຶກສາເຂົ້າຮ່ວມທັງໝົດ 10 ຄົນ, 3 ຄົນ. ຂະບວນການອອກແຮງງານໄດ້ເລີ່ມເວລາ 5:30 ນາທີ ໂດຍໄດ້ອະນາໄມຕົ້ນໄມ້ກິນໝາກ, ຕົ້ນໄມ້ປະດັບທີ່ໄດ້ປູກອ້ອມເດີ່ນກິລາໂຮງຮຽນສາທິດວິທະຍາໄລຄູ .ໃນການອະນາໄມຄັ້ງນີ້ ແມ່ນໄດ້ສຸມໃສ່ການອະນາໄມອ້ອມຕົ້ນໄມ້, ພວນດິນໃສ່ອ້ອມຕົ້ນໄມ້. ພ້ອມດຽວກັນນີ້ຍັງໄດ້ອະນາໄມບໍລິເວນຫໍພັກໃຫ້ມີຄວາມສະອາດຈົບງາມ. ຂະບວນການອອກແຮງງານໄດ້ດຳເນີນໄປເປັນເວລາ 1 ຊົ່ວໂມງ ແລະ ໄດ້ຮັບຜົນສໍາເລັດຕາມແຜນທີ່ວາງໄວ້. ສໍາລັບແຜນໃນຄັ້ງຕໍ່ໄປແມ່ນຍັງຈະໄດ້ສືບຕໍ່ແປງຮົ້ວອ້ອມຕົ້ນໄມ້ຈໍານວນໜຶ່ງອ້ອມເດີ່ນກິລາ. ຜູ້ສື່ຂ່າວວິທະຍາໄລຄູຫຼວງນໍ້າທາ ສົມແພງ ດວງປະເສີດ

ບັນຍາກາດການແຂ່ງຂັນກິລາບານເຕະລຸ້ນອາວຸໂສສ້າງຂະບວນການຕ້ອນຮັບວັນສ້າງຕັ້ງແມ່ຍິງສາກົນ ຄົບຮອບ 114 ປີ(8 ມີນາ 1910 – 8 ມີນາ 2024)

ໃນຕອນບ່າຍວັນທີ 21 ກຸມພາ 2024 ຢູ່ທີ່ເດີ່ນກິລາເປຕັງວິທະຍາໄລຄູຫຼວງນໍ້າທາ ໄດ້ມີພິທີເປີດການແຂ່ງຂັນກິລາເປຕັງຊິງຂັນຜູ້ອໍານວຍການຂື້ນ ພາຍໃຕ້ການເປັນປະທານຂອງ ທ່ານ ອຈ ປອ ສິນນະກອນ ສີເມືອງ ຫົວໜ້າພະແນກບໍລິຫານ-ການເງິນ, ໃນພິທີມີຄະນະນໍາພະແນກ, ຄະນະນໍາພາກວິຊາ, ຕາງໜ້າ 3 ອົງການຈັດຕັ້ງ, ຄູ-ອາຈານ ແລະ ນັກສຶກສາເຂົ້າຮ່ວມຢ່າງທົ່ວເຖິງ. ໃນພິທີ ທ່ານ ອຈ ປອ ສິນນະກອນ ສີເມືອງ ໄດ້ກ່າວມີຄໍາເຫັນ ແລະ ເປີດການແຂ່ງຂັນຢ່າງເປັນທາງການ ໂດຍການສ້າງກິດຈະກໍາໃນຄັ້ງນີ້ເປັນການສ້າງຂະບວນການຂໍານັບຮັບຕ້ອນວັນສ້າງຕັ້ງແມ່ຍິງສາກົນ ຄົບຮອບ 114 ປີ (8 ມີນາ 1910 – 8 ມີນາ 2024), ໃນໂອກາດດຽວກັນ ທ່ານ ຍັງໄດ້ຮຽກຮ້ອງໃຫ້ນັກກິລາເປຕັງແຕ່ລະທີມເຂົ້າຮ່ວມແຂ່ງຂັນດ້ວຍຄວາມຮັບຜິດຊອບສູງ ແລະ ມີນໍ້າໃຈນັກກິລາ. ການແຂ່ງຂັນກິລາເປຕັງຊິງຂັນຜູ້ອໍານວຍການ ມີ 12 ທີມເຂົ້າຮ່ວມ ແລະ ຈະດໍາເນີນໄປເປັນເວລາ 11 ວັນ ຈົນເຖິງວັນທີ 8 ມີນາ 2024 ຈຶ່ງຈະສໍາເລັດ. ນັກຂ່າວວິທະຍາໄລຄູຫຼວງນໍ້າທາ: ສົມແພງ ດວງປະເສີດ